Земјите членки на Европската Унија постигнаа договор за пакет мерки со кои треба да се зајакне надзорот над финансиските пазари и да се направи голем чекор кон создавање заедничка унија за штедење и инвестиции. Целта е дел од огромната заштеда на европските граѓани, која сега се чува во банките со ниски приноси, да се насочи кон инвестиции што би можеле да донесат поголема заработка.
Според проценките, европските домаќинства чуваат околу 10 билиони евра во банкарски заштеди. Европските институции сметаат дека дел од овие средства би можеле да се искористат за финансирање иновативни компании, развој на бизнисите и зајакнување на конкурентноста на европската економија.
Договорот предвидува зајакнување на овластувањата на Европското тело за хартии од вредност и пазари (ESMA), со седиште во Париз. Оваа институција би требало да добие поголема улога во надзорот над финансиските пазари во земјите членки, со цел да се намали нивната фрагментираност и да се олесни прекуграничното инвестирање.
Сепак, договорот е постигнат со компромис. Германија успеала да обезбеди исклучување на групацијата Deutsche Börse, која управува со Франкфуртската берза, од централизираниот надзор. На состанокот на министрите за финансии во Луксембург, сите земји членки го поддржале компромисот, освен Белгија, која била воздржана.
Европската комисија го претстави предлогот за реформа минатата година, оценувајќи дека создавањето поинтегриран финансиски пазар е неопходно за да може Европа поефикасно да ги мобилизира сопствените финансиски ресурси.
За разлика од САД, каде што постои поинтегриран пазар на капитал, Европската Унија и натаму функционира преку 27 национални финансиски пазари, со различни правила и практики. Токму оваа поделба се смета за една од главните пречки за поефикасно насочување на европската заштеда кон инвестиции.
„Време е заштедата да се стави во функција“, изјави ирскиот министер за финансии Сајмон Харис, оценувајќи дека договорот е важен чекор кон подлабока финансиска интеграција и долгорочно зајакнување на конкурентноста на ЕУ.
Важно е да се напомене дека договорот не значи дека граѓаните ќе мора да ги повлечат парите од банките или дека нивните депозити автоматски ќе бидат инвестирани на берзите. Станува збор за реформи со кои треба да се олесни инвестирањето и да се создадат повеќе можности за граѓаните и компаниите да ги вложуваат своите средства.
