Семејствата треба да имаат доволно пари при рака за три дена во случај на вонредна состојба, предупреди денес централната банка на Холандија.
Банката им советуваше на граѓаните да чуваат 70 евра по возрасен и 30 евра по дете во готово, во случај електронските системи за плаќање да престанат да работат.
Како причина за оваа препорака, банката ја наведе заканата од сајбер напади, кои носат зголемен ризик со оглед на сè понапнатата геополитичка ситуација.
Во април, прекинот на електричната енергија во Шпанија и Португалија предизвика сериозни, но на крајот краткотрајни проблеми со платните системи.
Издвоените пари треба да бидат доволни за покривање на „минималните потребни трошоци за период од три дена, како што се вода, храна, лекови и превоз“.
Централната банка на Холандија, исто така, им даде совет на трговците: тие треба да имаат алтернативни системи за плаќање, како што е скенирање QR кодови, во случај ПОС терминалите да не работат.
Во март, Европската комисија објави план за подготвеност со кој им препорачува на граѓаните да складираат храна три дена, со цел да се обезбедат залихи во случај на вонредни состојби како што се војна или природни катастрофи.
