На светските берзи цените на нафтата благо пораснаа минатата недела, по седум недели пад, а значително флуктуираа во текот на неделата, во зависност од вестите за понудата и побарувачката.
На лондонскиот пазар цената на барелот минатата недела порасна за 0,9 отсто, на 76,55 долари, додека на американскиот пазар цената на барелот порасна за 0,3 отсто, на 71,43 долари.
Првиот раст на цените по седум недели пад е благодарение на надежта на трговците дека побарувачката за нафта ќе се зголеми следната година, бидејќи се чини дека циклусот на покачување на каматните стапки во западните земји е завршен.
На последниот состанок годинава, челниците на американската централна банка ги оставија каматните стапки непроменети, со оглед на тоа што инфлаторните притисоци во САД постепено се намалуваат и оценија дека во наредната година каматните стапки ќе бидат намалени и тоа во три наврати.
Ова најверојатно значи дека, и покрај наглото зголемување на каматните стапки за повеќе од една и пол година, најголемата светска економија ќе избегне рецесија. А тоа, пак, значи стабилизирање на побарувачката на нафта.
Соопштението на ФЕД за намалување на каматните стапки доведе до пад на доларот во однос на кошничката валути на најниско ниво во последните четири месеци, што исто така ги поддржа цените на нафтата, бидејќи послабиот долар ја прави нафтата поевтина за купувачите во други валути.
Поради пониската цена и можното зајакнување на побарувачката во САД, светската потрошувачка на нафта ќе се зголеми во 2024 година за 1,1 милион барели дневно, околу 130 илјади повеќе од претходно очекуваното, проценува Меѓународната агенција за енергија (ИЕА).
„Намалувањето на производството на ОПЕК + веројатно ќе го одржи пазарот на нафта во рамнотежа на почетокот на 2024 година, и покрај послабата побарувачка, што би требало да ја намали моменталната загриженост за прекумерната понуда“, велат од Commerzbank.
ОПЕК +, кој ги обединува земјите и сојузниците на ОПЕК, се согласи на крајот на ноември да го намали производството за околу 2,2 милиони барели дневно за првиот квартал од следната година.
Сепак, слабите економски податоци на најголемата европска економија, Германија, и најголемиот светски увозник, Кина, го ограничија растот на цената на нафтата минатата недела.
По падот во претходните недели, цените на нафтата се на пат за загуби оваа година. На лондонскиот пазар цената на барелот моментално е во минус во однос на почетокот на годината за околу 11 отсто, како и на американскиот пазар.
