Руралните области во Обединетото Кралство ги надминаа градовите кога станува збор за растот на цените на куќите во последните пет години, со просечна стапка од 22 отсто.
Податоците што ги објави финансиската институција „Nationwide“ покажуваат дека во споменатиот период просечните цени на куќите во доминантно руралните средини пораснале за пет отсто побрзо од оние во урбаните средини, објави Гардијан.
Оваа ситуација првенствено е предизвикана од пандемијата, која доведе до зголемување на бројот на луѓе кои сакаат да се преселат од градовите во руралните средини, помалите градови или на брегот. Куќите со поголеми градини, кои нудат повеќе простор за работа од дома, стануваат сè попопуларни.
Се додава дека становите во урбаните средини биле најмалку интересни за купувачите во последните пет години.
Сепак, истражувањата покажаа дека некои од оние кои се преселиле во руралните области во меѓувреме ги продале своите домови и се вратиле во предградијата или градот.
Најатрактивните рурални средини ги вклучуваат туристичките дестинации Девон и Езерскиот округ, што сугерира дека добар дел од побарувачката паѓа на оние кои купуваат викендички, наведува „Nationwide“.
Според гореспоменатата финансиска институција, од 349 локални области во ОК, мнозинството (61 процент) се класифицирани како претежно урбани и нешто повеќе од една четвртина (26 проценти) како претежно рурални.
