Растот на цените на горивата, особено на дизелот, ги загрижува граѓаните во Австрија, а експертите веќе не ја исклучуваат можноста цената на дизелот да достигне и три евра за литар.
Цената на дизелот во Австрија оваа недела го надмина нивото од 2,30 евра за литар.
Претседателот на Здружението на трговци со енергенси при Стопанската комора, Јирген Рот, изјави за ORF дека пред само неколку недели бил убеден дека цената на дизелот во никој случај нема да достигне три евра, но дека од денешна перспектива таквата можност веќе не може да се исклучи.
Рот истакна дека австриската влада, покрај актуелните поскапувања, за следната година предвидела и повеќе мерки кои ќе донесат дополнително даночно оптоварување.
Според него, трговците со енергенси не остваруваат дополнителен профит поради рекордно високите цени на горивата.
„Наш интерес е горивото да биде поевтино, бидејќи маржата по литар, која изнесува неколку центи, е секогаш иста, без разлика дали цената е 2,20 или 1,50 евра“, објасни Рот.
Тој истакна дека продавачите на енергенси најмногу сакаат цените на меѓународниот пазар повторно да паднат и додаде дека во тој случај падот веднаш би им го пренеле на потрошувачите.
Според економистот Јерн Клајнерт, главни профитери од кризата се производителите, особено оние во региони кои не се погодени од кризата, како и преработувачите кои понатаму го продаваат горивото.
Според него, токму затоа на европско ниво треба да се разгледа воведување данок на прекумерна добивка, со кој државите би можеле да соберат средства и потоа да им ги вратат на потрошувачите.
