Шпанија не увезе ниту еден барел сурова нафта од Венецуела во април, според официјалните податоци објавени денес, што е директна последица на барањата на САД за прекин на работењето со венецуелската државна нафтена компанија PDVSA поради санкции.
Во текот на првите месеци од 2025 година, увозот на шпанска нафта од Венецуела забележа раст од речиси 60 проценти во споредба со истиот период минатата година, пред новата администрација на американскиот претседател Доналд Трамп да воведе построги санкции, објавува Ројтерс.
Шпанската нафтена компанија Репсол беше една од неколкуте европски компании кои, заедно со американската Шеврон и италијанската Ени, имаа привремени дозволи од Вашингтон за увоз на нафта од Венецуела како дел од механизмот за отплата на долговите на PDVSA кон овие компании.
Тој аранжман беше одобрен за време на претходната претседателска администрација на Џозеф Бајден.
По доаѓањето во Белата куќа, Доналд Трамп не продолжи никакви исклучоци, а неговата администрација нареди целосно прекинување на трговијата со нафта со Венецуела.
Вкупниот извоз на венецуелска нафта во мај остана практично непроменет и покрај мерките на САД, изнесувајќи 779.000 барели дневно (bpd), што е само мал пад во споредба со априлските 783.000 bpd, според интерните документи на PDVSA и податоците за движењето на танкерите.
Клучна улога во зачувувањето на извозните квоти одигра Кина, која го зголеми увозот и со тоа ги компензираше загубите на PDVSA, објавува порталот Oilprice.
