Бугарија е подготвена да го усвои еврото на 1 јануари 2026 година, откако ќе ги исполни сите потребни критериуми, објави Европската комисија во својот Извештај за конвергенција за 2025 година.
Извештајот, подготвен на барање на бугарските власти, потврди дека земјата ги исполнува четирите номинални критериуми за конвергенција потребни за усвојување на еврото и дека нејзиното законодавство е усогласено со правилата на Европската Унија, пренесува агенцијата Анадолу.
„Ова означува критичен и историски чекор на патот на Бугарија кон усвојување на еврото“, соопшти комисијата, додавајќи дека економијата на земјата е доволно подготвена за интеграција во еврозоната.
Претседателката на Европската комисија, Урсула фон дер Лајен, го поздрави овој развој на настаните, велејќи дека денес Бугарија е еден чекор поблиску до усвојување на еврото како своја валута.
„Благодарение на еврото, економијата на Бугарија ќе стане посилна, со поголема трговија со партнерите од еврозоната, странски директни инвестиции, пристап до финансии, квалитетни работни места и реални приходи“, рече таа.
Бугарија ќе стане 21-ва членка на Еврозоната, во исчекување на конечната одлука на Советот на ЕУ.
Извештајот на комисијата беше објавен со паралелна оценка од страна на Европската централна банка.
Бугарија го поднесе своето официјално барање за посебен Извештај за конвергенција во февруари 2025 година.
