Американскиот нафтен гигант „Шеврон“ (Chevron) разгледува опции за купување на глобалните средства на руската нафтена компанија „Лукоил“, која е под санкции, изјавија денес за „Ројтерс“ пет извори запознаени со процесот.
Министерството за финансии на САД минатата недела даде зелено светло за потенцијалните купувачи да разговараат со „Лукоил“ за странскиот имот. „Шеврон“ ќе им се придружи на „Карлајл“ и други компании во трката за портфолиото на „Лукоил“ вредно најмалку 20 милијарди долари.
Минатиот месец, САД воведоа санкции врз двете најголеми нафтени компании во Русија, „Лукоил“ и „Роснефт“, како дел од напорите на администрацијата на претседателот Доналд Трамп да ја принуди Москва да започне мировни преговори со Украина.
„Шеврон“ истражува опции за купување на средствата на „Лукоил“ каде што нивните активности се преклопуваат, а не на целото портфолио, изјавија пет извори. Тие побараа да останат анонимни бидејќи не се овластени да зборуваат со медиумите. Интересот на „Шеврон“ досега не е објавен, според „Ројтерс“.
„Шеврон“ изјави дека ги почитува законите и прописите што важат за неговото работење и не коментира за комерцијални прашања.
Да потсетиме дека американскиот инвестициски гигант „Карлајл“ разгледува опции за купување на имотот на „Лукоил“ во странство.
Групацијата „Гунвор“ ја повлече својата понуда за купување на меѓународните средства на „Лукоил“, вклучувајќи ја и компанијата на „Лукоил“ во Србија, откако Министерството за финансии на САД ја нарече оваа група „марионета на Кремљ“.
