Унгарските и бугарските власти најдоа решение за плаќање на гасот од Русија, кое не подлежи на санкции од Запад против руската Гаспромбанк, изјави унгарскиот министер за надворешни работи Петер Сијарто.
„Овој проблем е решен, најдено е правно и финансиско решение кое ги задоволува и бугарските партнери и нашата страна, а во исто време не потпаѓа под санкциите“, рече Сијарто во својата видео порака на Фејсбук, не прецизирајќи детали.
Унгарскиот министер потсети дека земјата добива руски гас преку гасоводот Турски тек кој минува низ Бугарија и Србија.
Најголем дел од гасот што Унгарија го троши доаѓа од Русија, а годинава обемот на испораките надмина седум милијарди кубни метри, пренесува Комерсант.
На 21 ноември, американското Министерство за финансии воведе санкции за Гаспромбанк преку кои земјите вршат плаќања за рускиот гас, со што се комплицираа тие трансакции.
Бугарскиот министер за енергетика Владимир Малинов оваа недела предупреди дека неговата земја би можела да го прекине транзитот на руски гас за Србија преку гасоводот Турски тек почнувајќи од новата година, доколку Гаспром не обезбеди плаќања кои се во согласност со американските санкции против Гаспромбанк, објави бугарска Новинита.
