Во вториот квартал од 2024 година, украинската економија порасна за 3,7 отсто на годишно ниво и за 0,2 отсто во однос на претходниот квартал, објави денеска Украинската државна служба за статистика (Держстат).
Економијата на Украина бележи годишен раст пет квартали по ред.
Сегашниот резултат укажува на забавување во споредба со растот од 6,4 отсто во првиот квартал од 2024 година, но и покрај војната со Русија, економијата на Украина расте пет последователни квартали. Народната банка на Украина (НБУ) минатата недела објави дека вторпат по ред ја задржала референтната каматна стапка на 13 отсто.
Банката смета дека оваа одлука ќе придонесе за постепено враќање на инфлацијата на целта од пет проценти во наредните години и ќе ја поддржи стабилноста на девизниот пазар.
Во август, потрошувачката инфлација во Украина се зголеми на 7,5 отсто на годишна основа, што беше блиску до јулската прогноза на НБУ, додека основната инфлација беше 6,5 отсто.
Порастот на потрошувачките цени е последица на овогодинешната полоша реколта, растот на деловните трошоци, платите и трошоците за енергија, како и падот на украинската валута гривна во претходните месеци.
