Трамп тврди дека Индија нема повеќе да купува руска нафта

Американскиот претседател Доналд Трамп објави дека Индија се согласила да престане да купува руска нафта и да ги зголеми купувањата од Соединетите Држави.

Додека САД го претставија овој потег како стратешка победа поврзана со војната во Украина, Индија сè уште не се изјаснила за руската нафта.

„Индија се согласи да престане да купува руска нафта и да купува повеќе од САД“, објави Трамп при објавувањето на договорот, по повеќе од една година трговски тензии меѓу двете земји. Клучната точка на спорот, која Трамп постојано ја истакнуваше, беше увозот на руска сурова нафта во Индија.

Во тој период, Трамп отворено изврши притисок врз Индија да ги ограничи купувањата на руска нафта во услови на тековната војна во Украина, постојано заканувајќи се дека ќе ги зголеми царините. Тој предупреди на воведување дополнителни давачки, дури и изјавувајќи дека на Индија „не ѝ е грижа колку луѓе умираат во Украина поради руската воена машинерија“.

Индија се согласила да купува нафта, воена стока, електроника, фармацевтски производи и телекомуникациски производи, како и авиони од Соединетите Држави како дел од трговскиот договор, изјави владин претставник за Ројтерс.

Трамп објави дека е постигнат трговски договор со Индија, со кој американските тарифи за индиската стока се намалуваат од 50 на 18 проценти, во замена за суспензија на купувањето руска нафта и намалување на трговските бариери, објавува Ројтерс.

Тој рече дека Индија се согласила да купува американска стока „на многу повисоко ниво“, вклучувајќи енергија, јаглен, технологија, земјоделски и други производи во вредност од 500 милијарди долари.

Неименуван индиски функционер рече дека одлуката за купување американска стока е донесена за да се намали трговскиот дефицит што САД го имаат со Индија.

Министерството за трговија на Индија не одговори на барањето за коментар.

Индискиот извоз во САД се зголеми за 15,88 проценти на годишно ниво на 85,5 милијарди долари во периодот јануари-ноември, додека увозот од САД изнесуваше 46,08 милијарди долари, според податоците од Министерството за трговија на Индија.

Службеникот изјави дека обврската за купување се однесува на сектори како што се фармацевтската индустрија, телекомуникациите, одбраната, нафтата и авионите и ќе се спроведува во текот на неколку години.

Тој додаде дека Индија понудила пристап до пазарот за некои земјоделски производи, без да образложува повеќе.

Според него, постигнатиот договор претставува прва фаза, додека за поопфатен договор ќе се преговара во наредните месеци.

Индија, како дел од договорот, ги намали царините за автомобили како дел од барањето на Вашингтон за намалување на трговскиот дисбаланс.

Поврзани вести

Останете поврзани
36,851фановикако
12,358следбенициследете
Последни написи