Новоизбраниот претседател Доналд Трамп денеска зборуваше од својата резиденција во Мар-а-Лаго, Флорида и одговараше на прашања на новинарите.
„Можете ли да му дадете гаранција на светот дека нема да употребите економска или воена сила при обидот да ја преземете контролата врз тие области“, го праша новинарот.
„Не“, кратко одговори Трамп. Неочекуваната изјава на Трамп доаѓа две недели пред тој повторно да влезе во Белата куќа на 20 јануари.
„Можете ли да ни кажете малку повеќе за тоа кој е вашиот план. Дали ќе преговарате за нов договор? Дали ќе побарате од Канаѓаните да одржат гласање? Која е стратегијата?“, продолжи новинарот.
„Не можам да ви гарантирам. Зборувате за Панама и Гренланд. Не можам да ви гарантирам за нив. Но, можам да кажам дека ни се потребни за економска безбедност. Панамскиот канал е изграден за војската“, рече Трамп. .
„Нема да се обврзам на тоа“, повтори тој, на прашањето дали ќе ја исклучи употребата на армијата. „Можеби ќе треба да направиме нешто. Панамскиот канал е од витално значење за нашата земја. Со него управува Кина. Ние го дадовме Панамскиот канал на Панама, не и го дадовме на Кина“, нагласи тој.
Панамскиот канал е воден пат кој ги поврзува Атлантскиот и Тихиот океан, а бил изграден од САД на почетокот на 20 век. Каналот и беше предаден на Панама во 1999 година со договорот од 1977 година.
Во последните недели Трамп предизвика контроверзии со неговите предлози за територијално проширување на САД.
Така, тој ја оживеа својата претходна идеја за купување на Гренланд, се закани дека ќе ја преземе контролата врз Панамскиот канал, па дури и предложи анексија на Канада од САД, опишувајќи го до неодамна канадскиот премиер Џастин Трудо како „гувернер на Големата држава Канада“.
Гренландскиот премиер Муте Буруп Егеде неодамна изјави дека „Гренланд не е на продажба и никогаш нема да биде“, додека данската влада изрази подготвеност да соработува со новата американска администрација, но без отстапки во однос на територијата. Трамп потоа ја повтори важноста на Гренланд за националната безбедност на САД, нарекувајќи ја сопственоста на островот „апсолутна неопходност“.
Трамп исто така рече дека ќе бара враќање на Панамскиот канал под американска контрола доколку Панама не ги намали трошоците за американските бродови. Панамскиот претседател Хозе Раул Мулино ја отфрли таа можност, нагласувајќи дека „секој квадратен метар од каналот и припаѓа на Панама“.
Трамп одговори на социјалните мрежи, објавувајќи слика од американското знаме над каналот со порака: „Добредојдовте во каналот на САД!
