Кинескиот претседател Си Џинпинг имаше телефонски разговор со претседателот на Соединетите Американски Држави, Доналд Трамп, објави кинеската државна новинска агенција Синхуа.
Разговорот се одржа на барање на Доналд Трамп, вели агенцијата.
Порано денес, CNN, повикувајќи се на извори, објави дека двајцата лидери ќе имаат телефонски разговор.
Со месеци, Трамп сугерираше дека неговиот личен однос со кинескиот претседател Си Џинпинг може да биде клучот за решение на најзначајниот трговски спор во светот, според американската телевизија.
Иако Трамп сака да ги спроведе своите тактики за склучување договори директно со Си, неговиот модел на пазарење меѓу лидерите е во остра спротивност со тоа како кинеските претставници пристапуваат кон глобалните преговори, се додава во извештајот на CNN.
Трамп вчера изјави дека кинескиот претседател Си Џинпинг е „тежок преговарач“ и дека е „исклучително тешко да се постигне договор со него“.
Вчера, Трамп потпиша извршна наредба со која се зголемуваат царините за увоз на челик и алуминиум од 25 на 50 проценти, а таа стапи на сила на полноќ по локално време.
Кина е најголемиот светски производител и извозник на челик и испорачува мали количини во САД по воведувањето на царини од 25 проценти во 2018 година.
Исто така, Кина е трет најголем снабдувач на алуминиум во САД.
