Претседателот на Соединетите Американски Држави, Доналд Трамп, изјави дека јапонската премиерка Санае Такаичи го информирала дека корпорацијата Тојота Мотор планира да изгради фабрики за автомобили низ САД со вкупна вредност од околу 10 милијарди долари.
„Тојота ќе изгради фабрики за автомобили во вредност од повеќе од 10 милијарди долари низ САД. Затоа, излезете и купете Тојота“, рече Трамп за време на обраќањето пред војниците на бродот „УСС Џорџ Вашингтон“.
Американскиот претседател ја пофали Јапонија за нејзините „големи инвестиции“ во САД и додаде дека двете земји ќе соработуваат и во бродоградбата.
Претседателот на Соединетите Американски Држави, Доналд Трамп, и премиерката на Јапонија, Санае Такаичи, потпишаа рамковен договор за обезбедување снабдување со ретки минерали, објави Белата куќа.
Договорот беше потпишан за време на посетата на Трамп на Јапонија, како дел од неговата турнеја низ Азија, со цел зајакнување на синџирите на снабдување со материјали клучни за обновливи извори на енергија, електроника и автомобилска индустрија, објави Ројтерс.
Според соопштението од Белата куќа, САД и Јапонија планираат заеднички инвестиции и користење на економски инструменти за развој на диверзифициран и фер пазар за ретки минерали.
