САД и Украина го потпишаа договорот за пристап до природните ресурси на Украина, објави Министерството за финансии на САД.
Според Си-Ен-Ен, САД и Украина потпишаа „договор за економско партнерство“ што ќе му даде на Вашингтон пристап до ретките минерали на Киев во замена за основање инвестициски фонд во Украина.
„Како што рече претседателот (Доналд Трамп), Соединетите Американски Држави се посветени на обезбедување помош за да се стави крај на оваа сурова и бесмислена војна (во Украина)“, изјави секретарот за финансии Скот Бесент.
Тој посочи дека договорот јасно ѝ сигнализира на Русија дека администрацијата на Трамп е посветена на мировен процес центриран кон слободна, суверена и просперитетна Украина на долг рок.
„И да бидеме јасни – на ниедна држава или лице кое ја финансирало или снабдувало руската воена машинерија нема да му биде дозволено да има корист од обновата на Украина“, нагласи тој.
Министерката за економија на Украина, Јулија Свириденко, го потпиша договорот во Вашингтон во име на украинската влада.
