Бранот на отпуштања во технолошкиот сектор се уште е силен, годинава се забележани над 130.000 отпуштања во 457 компании, покажуваат податоците на порталот Layoffs.fyi кој ги следи отпуштањата.
Големите компании како Тесла, Амазон, Гугл, Тикток, Снеп и Мајкрософт отпуштија многу работници во првите месеци од 2024 година, а помалите стартапи исто така беа принудени да направат кратења, додека во некои случаи тие целосно престанаа да работат, пренесува Tech.
Најлош месец за голем број вработени во технолошкиот сектор бил јануари, кога биле отпуштени 34.107 работници, а потоа следуваат август со 26.024 отпуштања и април, при што биле отпуштени 22.423 луѓе.
Следејќи ги овие отпуштања, можеме да го разбереме влијанието врз иновациите кај големите и малите компании, како и пенетрацијата на вештачката интелигенција (АИ) во работните места за кои претходно се мислеше дека се заштитени од надворешни влијанија, додава технолошкиот портал.
На пример, платформата за учење јазик Duolingo потврди дека отпуштила 10 отсто од својот персонал бидејќи повеќе ќе користи вештачка интелигенција за да го насочи производството на содржина и преводите што претходно ги правеле луѓе.
