Србија и Русија почнаа да работат на проширување на подземното складиште за гас во Банатски Двор, изјави за Спутник генералниот директор на „Србијагас“ Душан Бајатовиќ.
Постигнавме договор кога е Банатски двор во прашање. Се договоривме да купиме руска опрема, ќе работиме со руски технологии на нејзино проширување… Ова е многу добра вест и за српските потрошувачи и за производителите на опрема во Русија – рече Бајатовиќ, додавајќи дека договорите за опремата се потпишани во вторник.
Како што беше претходно најавено, Србија и Русија планираат да го прошират подземното складиште за гас на 750 милиони кубни метри, како и да складираат гас во Честерег на северот на Србија.
Во интервју за Спутник во декември, Бајатовиќ рече дека проширувањето на подземното складиште во Банатски Двор и складирањето на гас во Честерег ќе овозможи складирање на 2,5-3 милиони кубни метри гас.
Србија има потреба од поголеми количини гас за зимата
Бајатовиќ најави средба со генералниот директор на Гаспром Алексеј Милер на маргините на Меѓународниот форум за гас во Санкт Петербург, на која ќе разговара за испорака на дополнителни количества гас за Србија.
За зимата ни требаат дополнителни количества гас, немаме доволно. Најважна тема е сигурното снабдување со гас на српскиот пазар… Не можам точно да кажам за какви дополнителни количини станува збор, но мислам дека испораките во грејната сезона ќе достигнат 400 милиони кубни метри, можеби и повеќе – изјави Бајатовиќ. .
Според него, цената на испораките е комерцијално прашање, а продолжувањето на актуелниот договор за испорака на гас најверојатно ќе се разгледува во првиот квартал наредната година, пишува „Политика“.
Според податоците на Бајатовиќ, Русија во 2023 година на Србија и испорачала 2,68 милијарди кубни метри гас, а годинава обемот на испораките треба да надмине три милијарди, пренесува Спутник.
Директорот на „Србијагас“ претходно зборуваше за тоа дека, согласно договорот со „Гаспром“, обемот на испораките во зима треба да се зголеми од шест милиони кубни метри на 11 милиони.
Цената на гасот е 300 долари за илјада кубни метри.
