Во Црна Гора вкупната надворешно-трговска размена со стоки од почетокот на годинава изнесува околу три милијарди евра, што укажува на раст од 3,1 отсто во однос на истиот период од претходната година.
Србија е најголемиот надворешно трговски партнер на земјата, објави денеска Монстат.
Црногорската управа за статистика наведува дека Црна Гора извезла најмногу стоки во Србија (112,9 милиони евра), Босна и Херцеговина (25,8 милиони) и Словенија (21,9 милиони).
Од друга страна, Црна Гора увезла најмногу од Србија (464,8 милиони евра), Кина (312 милиони) и Германија (264,2 милиони).
Во Црна Гора, во првите осум месеци од годинава, извозот на стоки достигнал вредност од 383,1 милиони евра, што е за 19,4 отсто помалку од 12 месеци претходно, додека увозот е 2.705,4 милиони евра, односно за 7,4 отсто повеќе отколку во август 2023 година.
Покриеноста на увозот со извоз изнесува 14,2 отсто и е помала во однос на истиот период од претходната година кога изнесуваше 18,9 отсто.
Во структурата на извозот, според стандардната меѓународна трговска класификација (СМТК), најзастапени се минералните горива и мазива во износ од 85,6 милиони евра, како што се електричната енергија (63,2 милиони евра) и други.
Од друга страна, според СМТК, најзастапени во структурата на увозот, во износ од 662,4 милиони евра, се машините и транспортните уреди, во кои спаѓаат патните возила (249,9 милиони евра) и други, објави Монстат.
Дирекцијата за статистика на Црна Гора посочува дека надворешно-трговската размена со стоки била најголема со членките на економската организација ЦЕФТА и со Европската унија.
