Надлежните подружници на Националната служба за вработување издале вкупно 50.397 работни дозволи на странски државјани во Србија во 2023 година, покажуваат податоците на Министерството за труд и вработување, пишува Политика во печатеното издание.
Најмногу работни дозволи се издадени на државјани на Русија, а потоа следат Кина, Турција, Индија и Непал, а предничат Русите со издадени 19.645 работни дозволи, соопшти Министерството за труд.
Со гледање на евиденцијата и системот на Националната служба за вработување, не постои можност да се дадат информации на кои работни места главно работат работниците од странство.
Најмалку работни дозволи минатата година се издадени на државјани на Камбоџа, Доминика, Малта, Судан, Обединетите Арапски Емирати…
Од почетокот на годинава на сезонски работни места во земјоделството се вработиле 1.091 странец.
Сезонски работници можат да бидат и странски државјани чие живеалиште во Србија е регистрирано во Министерството за внатрешни работи. Со оглед на тоа што ангажирањето на сезонски работи е работа надвор од работен однос, за нив не важат посебни услови за вработување на странци и важат истите услови како и за сите други лица кои се државјани на Србија.
Националната алијанса за локален економски развој (НАЛЕД) соопшти дека вкупниот број на регистрирани сезонски работници годинава изнесува 33.054, што покажува дека процентот на странци е мал во споредба со српските државјани, бидејќи е околу 3,3 отсто.
„Странските граѓани речиси и да не биле ангажирани на сезонски работни места во земјоделството до 2021 година, по што се забележува тренд на зголемување на бројот на апликации. Во последните две години, бројот на странци кои се занимаваат со сезонска работа во земјоделството не е променет во голема мера“, велат од НАЛЕД.
Наведоа и дека во однос на 2022 година, кога биле ангажирани 967 работници, годинава тој број е зголемен за 124 пријави.
Тие додаваат дека најголем број странски работници доаѓаат од Узбекистан и Египет, а претходните години биле ангажирани работници од Непал и Индија.
По проверка на живеалиштето, што може да се врши и по електронски пат, странски државјанин добива матичен број за странци (ЕБС) со кој работодавачот го пријавува работникот, пишува Политика.
