Владата на Србија од 1 јануари до 30 јуни 2026 година воведе привремени мерки со кои се ограничува увозот на одредени производи од железо и челик, како и на портланд цемент, со образложение дека се работи за заштита на домашната индустрија и стабилизирање на пазарот.
Со уредбата се опфатени пет групи производи, меѓу кои портланд цемент, топло и ладно валани челични производи, арматурен челик, како и топло валана жица и шипки. За овие категории се утврдени тарифни квоти, а по нивното исполнување ќе се применува дополнителна царина од 50 отсто.
Вкупната квота изнесува 421.094 тони, при што најголем дел од количината се однесува на цемент. Квотите се распределени по земји и царински територии, врз основа на нивниот удел во увозот во претходниот период, со цел да се избегнат нагли нарушувања на снабдувањето.
Мерката се однесува на увоз од повеќе земји, вклучувајќи ги членките на Европската унија, како и Турција, Босна и Херцеговина, Македонија, Албанија, Украина, Кина и Белорусија.
Според надлежните институции, ограничувањата се воведуваат како привремена заштита на домашните производствени капацитети, особено во услови на зголемени инфраструктурни активности и нестабилни глобални пазари на суровини.
Економските аналитичари предупредуваат дека ваквите мерки можат краткорочно да им помогнат на домашните производители, но истовремено носат ризик од повисоки цени за градежниот сектор и компаниите кои зависат од увоз на железо, челик и цемент.
