Најголем број регистрирани јахти во Црна Гора, 149, се во сопственост на граѓани или фирми од Србија, што е речиси една третина од вкупниот број, откри извештајот на Управата за поморска безбедност и управување со пристаништа на Црна Гора.
Според овие податоци, во Црна Гора заклучно со 1 октомври годинава се регистрирани вкупно 494 јахти, односно 80 повеќе од крајот на минатата година, објави РТЦГ.
Граѓаните на Србија годинава по бројот на јахти ги претекнаа граѓаните на Русија кои се на второ место со вкупно 125 јахти, додека граѓаните на Црна Гора регистрирале вкупно 69 од овие пловни објекти.
Следуваат Украина и Соединетите Американски Држави со по 18 јахти, а меѓу водечките земји се Босна и Херцеговина со 13 и Германија со осум регистрирани јахти.
Од вкупниот број на јахти, според видот на сопственоста, доминираат физички лица кои регистрирале 402 јахти, додека правните лица, односно фирмите регистрирале 92 јахти.
