Владата на Словенија донесе одлука да му забрани влез на израелскиот премиер Бенјамин Нетанјаху, со што стана првата членка на Европската Унија што воведе таква мерка против израелскиот премиер.
Оваа одлука доаѓа по претходно воведените санкции против двајца израелски министри – министерот за национална безбедност Итамар Бен-Гвир и министерката за финансии Безалел Смотрич, кои беа прогласени за непожелни лица поради, како што е наведено, „геноцидни изјави“ против Палестинците.
„На јавноста ѝ е познато дека тој се гони за воени злосторства и злосторства против човештвото. На 19 јули 2024 година, Меѓународниот суд на правдата утврди дека голем број израелски политики и практики го кршат меѓународното хуманитарно право и човековите права“, изјави државниот секретар во Министерството за надворешни работи Нева Грашиќ по состанокот на кабинетот.
Во август минатата година, Словенија стана првата членка на ЕУ што воведе ембарго за извоз на оружје во Израел, а во јуни 2024 година им се придружи на Норвешка, Шпанија и Ирска во признавањето на Палестина како независна држава. Со тоа, таа дополнително ја потврди својата позиција меѓу најгласните европски критичари на потезите на Израел во Газа.
Словенечката претседателка Наташа Пирц Мусар, во своето обраќање пред Генералното собрание на ОН во вторник, предупреди на геноцидот во Газа, повикувајќи ја меѓународната заедница да преземе итни мерки:
„Треба да го сториме правилното. Ние не го запревме Холокаустот, ние не го запревме геноцидот во Руанда, ние не го запревме геноцидот во Сребреница. Мора да го запреме геноцидот во Газа. Нема повеќе изговори. Нема.“
