Словачка и Унгарија побараа од Европската комисија поголема флексибилност во планот за постепено укинување на увозот на руски гас, како и дополнителни средства од Европската Унија за развој на нафтената и гасната инфраструктура. Двете земји предупредуваат дека прекинувањето на испораките на руски енергенси од 2027 година може да им создаде дополнителни економски проблеми.
Словачката вицепремиерка Дениса Сакова изјави во Братислава дека нејзината земја сака да разговара со Европската комисија за тоа како следниот буџетски период на ЕУ и достапните фондови би можеле да ги задоволат потребите на земјите од Вишеградската група, во која членуваат Словачка, Унгарија, Чешка и Полска.
Земјите од Централна Европа бараат Брисел да ги земе предвид нивната географска положба и зависноста од постојните транспортни правци за снабдување со енергенси. Според нив, пронаоѓањето алтернативни извори е поскапо и потешко отколку за другите членки на Унијата.
На самитот на ЕУ во октомври, земјите од Вишеградската група побараа и мерки за намалување на високите сметки за електрична енергија, поголема флексибилност во европскиот систем за тргување со емисии на јаглерод диоксид и одложување на втората фаза од системот, познат како ETS2, до 2030 година.
Европскиот комесар за енергетика Дан Јоргенсен оцени дека ситуацијата со цените на енергијата во Централна Европа е сериозна и се заложи за привремени и насочени мерки, кои нема да ги загрозат напорите на ЕУ за намалување на зависноста од увозни фосилни горива.
Унгарија и Словачка сметаат дека планот за укинување на рускиот увоз може да ја загрози конкурентноста на нивните индустрии. Унгарија веќе покрена правна постапка пред Судот на Европската Унија, која ја поддржа и Словачка.
Двете земји бараат Брисел да овозможи поприлагоден пристап кон нивните енергетски потреби, предупредувајќи дека брзото прекинување на руските испораки може да донесе дополнителни трошоци за компаниите и потрошувачите.
