Претседателот на Соединетите Американски Држави, Доналд Трамп, ги паузираше новите царини за голем број земји, но ги остави на сила оние за Кина, втората по големина економија во светот, во висина од 145 отсто.
Посетата на Си на Виетнам ѝ овозможува на Кина да ѝ покаже на Југоисточна Азија дека е одговорна суперсила, за разлика од начинот на кој САД се претставуваат пред светот под претседателот Доналд Трамп, вели Нгуен Как Гианг, истражувач во Институтот ИСЕАС Јусоф Ишак во Сингапур.
Кина може да работи на зајакнување на сојузите и изнаоѓање решенија за високата царинска бариера што САД ја постави на нејзиниот извоз.
„Нема победник во трговска војна или тарифна војна. Нашите две земји треба цврсто да го чуваат мултилатералниот трговски систем, стабилните глобални индустриски и снабдувачки синџири и отворената и кооперативна меѓународна средина“, пишува Си во едиторијал објавен во виетнамските и кинеските официјални медиуми.
Си пристигна во Ханој на почетокот на дводневната посета на Виетнам. Иако неговото патување веројатно беше планирано порано, сега доби на значење пред сѐ поради тарифната војна меѓу Кина и САД, двете најголеми економии во светот.
Во Виетнам, Си ќе оствари средби со генералниот секретар на Комунистичката партија на Виетнам То Лам и премиерот Фам Мин Чин.
Истражувачот Нгуен сугерира дека патувањето на Си во Виетнам, Малезија и Камбоџа е за тоа како Кина може да се изолира од политиките на Трамп.
Периодот на патување на Си испраќа силна политичка порака, дека Југоисточна Азија е важна за Кина, рече Хуонг Ле-Ту од Меѓународната кризна група. Ле-Ту додава дека со оглед на опсегот на царините на Трамп и покрај 90-дневната пауза, земјите од Југоисточна Азија се загрижени дека царините, доколку се применат, би можеле да го комплицираат нивниот развој.
Таа рече дека патувањето на Си е предвидено да покаже како Кина се разликува од личниот интерес на САД и дека ова е демонстрација за тоа какво лидерство и иницијативи ќе има Кина во ова време на криза.
Виетнам има искуство во балансирање на односите со САД и Кина. Виетнам е управуван од комунистички еднопартиски систем како Кина, но има силни врски со САД, пишува агенцијата АП.
Кина е најголемиот трговски партнер на Виетнам, а според кинеските државни медиуми, кинеско-виетнамската трговија порасна за 14,6 отсто на годишно ниво во 2024 година.
Но, интензивирањето на трговската војна го стави Виетнам во многу несигурна позиција со оглед на впечатокот во САД дека Виетнам служи како спореден излез за кинеските стоки, велат аналитичарите. Претседателот Трамп воведе царини од 46 отсто за Виетнам пред да прогласи 90-дневна пауза.
Кина и Виетнам имаат и разлики и спорови, вклучително и за териториите во Јужното Кинеско Море. Виетнам има повремени судири со кинеската крајбрежна стража, но често не се објавуваат информации за тие конфронтации. По Виетнам, Си треба да замине во Малезија и Камбоџа.
