Саудиските нафтени претставници интензивно проценуваат колку би можеле да пораснат цените на нафтата ако војната во Иран и поврзаните прекини во снабдувањето не завршат наскоро, а нивните заклучоци предизвикуваат загриженост. Според основното сценарио, цените би можеле да надминат 180 долари за барел ако прекините продолжат и по април, пишува „Волстрит џурнал“.
Иако таков драстичен скок на цените на прв поглед може да изгледа како голема финансиска добивка за кралството, кое сè уште во голема мера се потпира на приходите од нафта, таквиот развој на настаните се смета за многу проблематичен. Цените на тоа ниво би можеле да предизвикаат глобална рецесија или да предизвикаат долгорочни промени во навиките на потрошувачите, од што би ја уништило побарувачката за нафта. Дополнително, Саудиска Арабија би ризикувала да биде перцепирана како воен профитер во конфликт што не го започнала.
„Саудиска Арабија генерално не сака ненадејни скокови на цените на нафтата бидејќи тие создаваат нестабилност на пазарот на долг рок“, рече Умер Карим, аналитичар за саудиска надворешна политика и геополитика во Центарот за истражување и исламски студии „Крал Фајсал“. „За Саудијците, идеалната ситуација е умерен раст на цените, а воедно и одржување на стабилен пазарен удел.“
Државната нафтена компанија „Сауди Арамко“, која е задолжена за производство, продажба и формирање на цените, одби да коментира за овие проценки.
