Министерството за финансии на Соединетите Американски Држави ќе го продолжи за дополнителни 30 дена ослободувањето од санкции за руската нафта транспортирана по море, објави денес Ројтерс.
Според извор запознаен со одлуката, тоа дошло откако неколку држави побарале дополнително време за купување на тој енергетски извор.
Агенцијата забележува дека барањето за продолжување е поднесено од посиромашни и енергетски загрозени земји кои останале без испораки на нафта од Персискиот Залив поради конфликтот меѓу САД и Иран и затворањето на Ормутскиот теснец.
Министерството за финансии на САД првпат го воведе ослободувањето во март за да ги ублажи нарушувањата на пазарот и зголемувањето на цените на нафтата предизвикани од конфликтите на Блискиот Исток, дозволувајќи продажба на руска нафта што беше блокирана од санкциите.
Ројтерс објави дека мерката не ја намали значително цената на нафтата, но им помогна на земји како Индија, која претходно беше меѓу најголемите купувачи на руска нафта.
Цената на суровата нафта Брент денес се зголеми за околу 1,5 проценти на околу 111 долари за барел поради загриженоста за глобалната понуда.
