Портпаролот на Кремљ, Дмитриј Песков, рече дека американскиот долар почнува да ја губи својата привлечност откако новоизбраниот американски претседател Доналд Трамп предупреди дека ќе воведе царини од 100 отсто за сите стоки од земјите на БРИКС, доколку тие ја заменат американската валута во трговијата.
„Доларот почнува да ја губи атрактивноста како резервна валута за голем број земји. Ова е процес на ерозија на атрактивноста на доларот, тој се одвива и зема замав“, нагласи Песков на брифингот со новинарите.
Покрај тоа, портпаролот инсистираше на тоа дека земјите постепено се движат кон употреба на нивните национални валути во меѓународната трговија поради агресивното наметнување на доларот од Вашингтон, пренесува агенцијата Баха.
Да потсетиме, новоизбраниот американски претседател Доналд Трамп изјави дека земјите од организацијата БРИКС можат да се збогуваат со идејата дека ќе го остават доларот затоа што САД нема да го гледаат со скрстени раце и дека ќе воведат царини од 100 отсто во случај да го напуштат доларот.
Трамп на својата социјална мрежа Truth social изјави дека САД бараат од земјите на БРИКС да се обврзат никогаш да не создаваат сопствена валута, ниту да поддржуваат која било друга како замена за американскиот долар.
„Во спротивно тие ќе се соочат со царина од 100 проценти и треба да очекуваат дека веќе нема да можат ништо да и продаваат на фантастичната американска економија. Нека најдат други „наивни“! Нема шанси БРИКС да го замени американскиот долар во меѓународната трговија, и секоја земја што ако се обиде, може да се збогува со Америка“, напиша Трамп.
