Продажбата на американско оружје во странство драстично порасна минатата година поради војната во Украина и достигна рекордни 238 милијарди долари, пишува Би-Би-Си, а пренесува Б92.
Американската влада директно преговарала за продажба на оружје во вредност од 81 милијарда долари, што е зголемување од 56 отсто во однос на 2022 година, потврди американскиот Стејт департмент. Останатите беа директна продажба на американски компании за воена употреба на странски земји.
Полска, која моментално сака да ги прошири своите воени капацитети, е меѓу најголемите купувачи на американско оружје. Полска купила хеликоптери Апачи за 12 милијарди долари и платила 10 милијарди долари за ракетни системи со голема подвижност (Химарс) и 3,75 милијарди долари за тенкови М1А1 Абрамс, се наведува во фискалниот извештај на американската влада. Полска исто така потроши 4 милијарди долари за интегрирани командни системи за воздушна и ракетна одбрана.
Се вели дека Германија потрошила 8,5 милијарди долари за хеликоптери „Шинук“, Бугарија платила 1,5 милијарди долари за оклопни возила „Стрикер“, Норвешка купила хеликоптери за повеќе мисии во вредност од 1 милијарда долари, а Чешка купила Ф-35 и муниција во вредност од 6,6 милијарди долари.
„Трансферот на оружје и одбранбената трговија се важни алатки на надворешната политика на САД со потенцијални долгорочни импликации за регионалната и глобалната безбедност“, се вели во годишниот извештај на американскиот Стејт департмент. Продажбата на американско оружје е зголемена и затоа што многу земји го напуштија руското оружје, иако Русија со децении е втор најголем продавач на оружје, по САД, изјави шефот на Одделот за трговија со оружје, пренесе Би-Би-Си.
