Зголемените тензии на Блискиот Исток го привлекуваат вниманието на пазарните аналитичари за нивното потенцијално влијание врз глобалниот пазар на нафта. Сепак, според мислењето на енергетскиот аналитичар др. Јусеф Алшамарија, Европа сега е во подобра позиција отколку во 2022 година и не се очекува да има повторување на енергетскиот ценовен шок, како по почетокот на конфликтот меѓу Русија и Украина.
Цените на нафтата
Во текот на изминатите месеци, цените на нафтата беа во пад, и покрај неодамнешниот благ пораст на цените по одлуката на американската централна банка да ја намали основната каматна стапка за половина процентен поен на 19 септември. Во моментот на известувањето, суровата нафта од типот „брент“ се тргуваше по 74 долари за барел, додека американската WTI беше по цена од 71 долари за барел. Двата пазарни индекси забележаа пад од околу 13 отсто во текот на третиот квартал од 2024 година.
Иако цената на нафтата порасна за 1,2 отсто во текот на изминатата недела, тензиите на Блискиот Исток може дополнително да го дестабилизираат пазарот. Сепак, др. Алшамари смета дека Европа благодарение на поголемиот број добавувачи ќе успее да избегне сериозен економски удар.
Според др. Алшамари, нафтениот пазар сега е многу поразновиден отколку пред две години, што го намалува ризикот од големи нарушувања.
На пазарот има повеќе добавувачи, што ја намалува зависноста од одредени региони. Иако нестабилноста на Блискиот Исток може да предизвика одредени нарушувања, Европа е во подобра позиција и не треба да доживее драматичен шок како во 2022 година – изјави тој за Euronews Business.
Енергетска транзиција и безбедност
Според него, Европа мора да ги ревидира своите пристапи кон енергетската транзиција. „Енергетските предизвици не се нови за Европа, но премногу амбициозните климатски цели влијаат на тоа каде одат инвестициите“, објаснува Алшамари.
Тој смета дека Европа треба да постави пореални цели за енергетската транзиција, но и да инвестира повеќе во енергетската безбедност, особено во природниот гас и нуклеарната енергија.
– Без природен гас и нуклеарна енергија, енергетската безбедност во Европа ќе остане нестабилна – предупреди Алшамари. Тој, исто така, нагласува дека проблемот со енергетската безбедност не ја вклучува само зависноста од Русија, туку и пошироките геополитички и пазарни фактори.
Третиот предизвик кој др. Алшамари го истакна е потребата од посилно единство меѓу земјите-членки на Европската унија. – За Европа да обезбеди стабилно снабдување со енергија и да ја спроведе транзицијата кон одржливи извори на енергија, потребна е поголема координација и соработка меѓу членките – нагласи Алхамари.
Иако растечките тензии на Блискиот Исток носат одреден ризик за глобалните енергетски пазари, Европа, благодарение на диверзификацијата на изворите и постабилниот пазар, е подобро подготвена да избегне ценовни шокови како оние од претходните години. Сепак, др. Алшамари предупредува дека Европа мора да ги ревидира своите климатски цели и да ги зголеми инвестициите во енергетската безбедност за да избегне идни енергетски кризи. Клучот за стабилноста ќе биде единството и соработката меѓу членките на Европската унија, пренесува Euronews.
