Рускиот претседател Владимир Путин на состанокот за економски прашања изјави дека руската економија продолжува да расте и покрај забавувањето на растот на БДП во третиот квартал.
Според Путин, рускиот БДП пораснал за 4,2 отсто во првите осум месеци. Меѓу тешкотиите кои влијаат на економскиот развој на земјата, Путин ги наведе санкциите и „сопствените структурни ограничувања“, пренесува Комерсант.
Годишниот раст на БДП за 2024 година се очекува да биде 3,9 отсто, што е над светскиот просек. Според проценките на Меѓународниот монетарен фонд (ММФ), растот на глобалниот БДП за тековната година ќе биде 3,2 отсто. Путин истакна дека растот на рускиот БДП е поддржан од позитивните резултати во индустријата.
„Индустрискиот раст во Русија за осум месеци беше 4,5 отсто. Преработувачката индустрија порасна за 8,1 отсто, додека машинскиот сектор забележа раст од речиси 20 отсто“, рече Путин. Исто така, Русија трет месец по ред забележа рекордно ниско ниво на невработеност од 2,4 отсто.
Претседателот на Русија додаде дека во економската ситуација на земјата се уште има тешкотии и нерамнотежа кои меѓу другото влијаат и на динамиката на цените за потрошувачите. Како предизвици тој ги наведе недостатокот на работна сила и технологија, логистичките проблеми и надворешните санкции.
На 22 октомври ММФ ја зголеми прогнозата за растот на БДП на Русија во 2024 година за 0,4 процентни поени, на 3,6 отсто, додека прогнозата за раст за 2025 година е намалена на 1,3 отсто. Според извештајот на ММФ, Русија е на четвртото место во светот според паритетот на куповната моќ.
