Експертите веруваат дека ги пронашле остатоците од авионот кој исчезна пред 53 години во Вермонт, САД.
Станува збор за приватен авион со пет мажи во него, кој исчезна од радарот набргу по полетувањето од аеродромот во Бурлингтон на 27 јануари 1971 година. Во него се превезувале двајца членови на екипажот и тројца вработени во Cousin’s Properties of Atlanta кои работеле на проект во Бурлингтон.
Експертите сега веруваат дека ги пронашле остатоците од тој авион во езерото Шамплејн, пренесува CBS.
Првичните пребарувања по авионот „Џет Командер“ во тоа време не покажаа ништо, а се веруваше дека езерото каде што се урна авионот замрзнало повеќе од четири дена по исчезнувањето на авионот.
Беа извршени најмалку 17 пребарувања, додека подводниот трагач Гери Козак и неговиот тим не ги пронајдоа остатоците во близина на местото каде што радио-контролната кула последен пат имала контакт со авионот пред да исчезне.
„Со сите докази што ги имаме, 99 отсто сме сигурни дека тоа е тој авион“, рече Козак.
Откривањето на потонатиот авион во езерото Шамплејн, лоцирано меѓу Њујорк и Вермонт, на семејствата на жртвите им дава „некои заклучоци и одговори на многу прашања“, додаде Козак.
Според него, потрагата траела толку долго бидејќи авионот се распаднал на многу делови кои не било лесно да се видат. „Авионот изгледа буквално како куп камења“, објасни тој.
