Активностите за промоција на мерките што произлегуваат од Оперативниот план за активните програми и мерки за вработување и услуги на пазарот на трудот за 2025 година денеска беа презентирани пред јавноста во Охрид.
Претставници на Министерството за економија и труд, Агенцијата за поддршка на претприемништво и на Агенцијата за вработување пред присутните зборуваа за можностите што на невработените им се нудат како опции преку односната мерка.
Во моментов активни се два јавни повици од Оперативниот план за активните програми и мерки за вработување и услуги на пазарот на трудот за 2025 година.
Првиот јавен повик е за мерката „Поддршка за креирање на нови работни места“, со подмерка – вработување и раст на правни субјекти, преку која се дава поддршка во креирање на нови работни места во микро, мали и средни претпријатија, социјални претпријатија и граѓански организации. Со мерката на претпријатијата им се дава грант за вработување на невработени лица, каде истата се движи од 160 до 220 илјади денари, во зависност од целната група, а јавниот повик отворен до 4 јули годинава.
Вториот активен јавен повик е за подмерката „Обука на работно место кај конкретен работодавач“ со која на невработените лица им се овозможува обука во времетраење до три месеци во работните простории на работодавачите согласно Програма за обука. Во односниот период на невработеното лице ќе му биде исплатен месечен паричен надомест од 12 илјади денари месечно со вклучено осигурување и данок на личен доход за времетраењето на тримесечната обука. Работодавачот има обврска да вработи најмалку половина од лицата вклучени во обуката со полно работно време во траење од најмалку три месеци.
На работодавачот ќе му биде исплатен еднократен износ од 25.000 денари по обучено лице по завршена обука, а огласот е активен до 30.11.2025 година.
Пеце Стефаноски од Охрид ги изнесе сопствените искуства од користењето на мерката „Вработување со грант“. Тој користејќи ја оваа мерка ја основа својата фирма „Лидер Стакло“ специјализирана за стакларски услуги, која благодарејќи на неговата посветеност и визија бележи успешен развој. Дополнително, преку искористување на мерката „Субвенционирање на плати“ Стефаноски во компанијата вработува уште едно лице со што директно придонесува кон локалниот економски раст и креирање на нови работни места.
Оперативниот план за вработување за 2025 година е вреден 40 милиони евра и опфаќа над 16 илјади невработени, а 65 проценти од овие лица се очекува да бидат на возраст до 29 години.
