По украинскиот напад на станица на гасоводот „Турски тек“, Бугарија презеде мерки за да обезбеди заштита на гасоводот „Балкански тек“ и другите објекти од енергетската инфраструктура, соопшти бугарската Агенција за национална безбедност.
Во писмената реакција до порталот Еурактив, агенцијата истакна дека се преземени мерки и за сузбивање на деструктивните акции.
„Преземени се мерки за следење и зајакнување на заштитата на важните инфраструктурни објекти, како и за борба против деструктивни дејствија преку ефективна координација и интеракција на сите надлежни институции во земјата и воспоставени механизми за соработка во ЕУ и НАТО“, соопшти Агенцијата.
Откако Украина го прекина снабдувањето со гас преку нејзината територија на 1 јануари, Турски тек и Синиот тек станаа единствените гасоводи што го носат рускиот гас под Црното Море до европската територија на Турција.
„Турски тек“ продолжува од Турција преку Бугарија, каде што се нарекува „Балкански тек“, а моментално ги снабдува Србија и Унгарија со гас.
Бугарија престана да увезува руски гас, но го продолжува својот транзит според договорите потпишани пред Русија да ја нападне Украина.
Турски тек или Балкански тек е клучен за Унгарија и Србија, а по прекинот на испораките преку Украина се очекува зголемување на транзитот на руски гас преку Бугарија до централна Европа.
Иако Бугарија не користи гас од Турски тек (Балкански тек), земјата заработува повеќе од 100 милиони евра годишно од транзитните такси.
Русија во понеделникот објави дека соборила девет украински беспилотни летала за кои рече дека се обидувале да нападнат дел од инфраструктурата на гасоводот Турски тек преку кој Русија испраќа гас во Турција, а потоа и во Европа, објави Ројтерс.
