Кардиналите ќе се сретнат денеска во Рим за да разговараат околу деталите за погребот на папата Франциск, кој почина вчера на 88-годишна возраст.
Кардиналите треба да одлучат за времето на погребот на покојниот поглавар на Католичката црква, што обично се случува од четири до шест дена по смртта на папата.
Иако по обичај, починатиот папа треба да биде погребан во базиликата Свети Петар, Франциск се очекува да биде погребан надвор од Ватикан, во базиликата Санта Марија Маџоре, една од неговите омилени локации и на погребот се очекува да присуствуваат шефови на држави и влади од целиот свет.
Телото на Франциск моментално се наоѓа во капелата на гостинската куќа Санта Марта, неговата резиденција во Ватикан и најверојатно утре ќе биде пренесено во базиликата Свети Петар, каде ќе биде изложено за оддавање на последна почит на поглаварот на каточичката црква, соопшти Ватикан.
Франциск, кој беше папа 12 години, почина вчера во 7:35 часот, по претрпен мозочен удар, соопшти Ватикан.
Како духовен водач на 1,4 милијарди католици во светот, Хорхе Марио Бергољо беше првиот папа од Латинска Америка, првиот језуит и првиот што го доби името по Свети Франциск од Асизи, средновековен монах кој живеел во сиромаштија.
Лидерите од целиот свет му оддаваат почит на Франциск по неговата смрт, истакнувајќи ја неговата понизност и сочувство, но и важност на папата кој според многумина, ја внесе католичката црква во нова ера и беше познат по своите либерални ставови.
