Од нафтоводот на делницата Сисак – Славонски Брод во Хрватска истекле 500 кубни метри нафта во околината, од кои досега се собрани околу 200 кубни метри, соопшти компанијата Јадрански нафтовод (ЈАНАФ), наведувајќи дека нема опасност за населението.
Претставници на компанијата информираа дека нафтата истекувала од петокот до вчера вечерта, откако нафтоводот бил оштетен за време на работите за негова ревитализација. Работите ги изведувала надворешна компанија ангажирана како изведувач.
Иако претходно, според неофицијални информации, се споменуваше можноста за истекување на околу 50.000 литри нафта, од ЈАНАФ сега проценуваат дека во околината истекле околу 500 кубни метри, односно 500.000 литри. Досега се собрани приближно 200 кубни метри.
Од компанијата информираат дека населението не е загрозено, ниту пак снабдувањето со вода за пиење. Мирисот на нафта, кој е локализиран во погоденото подрачје, постепено ќе се намалува во текот на санацијата.
Санацијата започнала веднаш по истекувањето и сè уште трае. Во моментов се работи на собирање на истечената нафта.
„Свесни сме за загриженоста на локалното население поради мирисот на нафта. Не постојат технички мерки со кои би можеле да го спречиме ширењето на непријатните мириси од погоденото подрачје“, соопштија од ЈАНАФ, додавајќи дека јавноста навремено ќе биде информирана за понатамошните наоди и активности.
Според директорот на Секторот за безбедност и заштита во компанијата, Иван Цвитановиќ, инцидентот се случил на 88. километар од нафтоводот Сисак – Славонски Брод, во близина на селото Првча.
Транспортот на нафта веднаш бил прекинат со затворање на блокадните станици Окучани и Лужани. На терен била испратена потребната механизација за ископување, проширување на работниот простор, чистење и собирање на истечената нафта.
Утврдено е дека дел од опремата на нафтоводот бил оштетен при контакт со работна машина.
Одговорноста за инцидентот дополнително ќе се утврдува, додека приоритет во моментов е санирање на теренот. Нафтоводот засега останува затворен.
Собирањето на преостанатата нафта ќе продолжи во следните неколку дена, а собраната количина ќе биде вратена во системот на ЈАНАФ.
Потоа ќе следува санација на контаминираното подрачје, која ќе опфати отстранување и замена на загадената почва, како и враќање на теренот во првобитната состојба.
Од ЈАНАФ очекуваат целиот процес да биде завршен за околу десет дена.
Претходно денеска од компанијата соопштија дека до оштетувањето дошло во петокот, за време на работите за ревитализација на нафтоводот, кога паднал дел од работниот систем. Притоа, нафтата истекла во канал ископан за потребите на изведувањето на работите. Истекувањето е запрено, а од компанијата повторија дека нема опасност за населението и водата за пиење.
