Уште една германска пиварница со долга традиција засекогаш ги затвора своите врати.
Пивото во пиварницата „Волтерс“ (Wolters) во Брауншвајг ќе се произведува до крајот на годината, потврди портпаролката на адвокатската канцеларија „Екерт“ (Eckert), задолжена за стечајната постапка.
Околу 90 вработени во понеделникот биле информирани за затворањето.
Пиварницата, основана во 1627 година, летово поднесе барање за стечај, наведувајќи го падот на продажбата на германскиот пазар на пиво како една од причините.
Во меѓувреме, „Волтерс“ побара и нов капитал.
„Потрагата по инвеститор за производствениот погон сепак не даде резултати“, соопшти адвокатската канцеларија.
Германскиот пазар на пиво минатата година забележа најголем пад од обединувањето на земјата, соопшти во почетокот на февруари Федералниот завод за статистика.
Компанијата летово како цел го наведе темелното реструктуирање на работењето и ново економско позиционирање. Стечајната постапка започна на 1 септември.
Синдикатот НГГ го критикуваше краткиот период меѓу започнувањето на стечајната постапка и одлуката за затворање.
Затворањето на пиварницата не мора да значи и крај на брендот.
„Напорите за зачувување на брендот „Волтерс“ продолжуваат“, соопшти адвокатската канцеларија.
Во моментов се водат „конструктивни разговори со повеќе заинтересирани страни“.
Во последните години и месеци во Германија се затворени повеќе пиварници поради слабата продажба.
Неодамна беше затворен и погонот во Херфорд, во Северна Рајна-Вестфалија. На почетокот на годината беше прекинато и производството на „Отингер“ (Oettinger) во Брауншвајг.
