Германските работници во автомобилската индустрија и инженерството ќе добијат зголемување на платите за 5,5 отсто по разговорите со синдикатот. Договорот, кој Европската централна банка внимателно го следи за неговото можно влијание врз инфлацијата, беше постигнат во тежок момент за најголемата европска економија.
Најголемиот индустриски синдикат во Германија постигна договор со работодавците, со што заврши спорот за платите во металната и електричната индустрија во земјата.
Новиот договор на синдикатот ИГ Метал, водечкиот синдикат на металците во Германија, предвидува зголемување на платите во две фази, вкупно 5,1 отсто, со трајно зголемување на колективно договорениот бонус.
Конечното зголемување на платата ќе изнесува 5,5 отсто, а договорот е склучен за период од 25 месеци.
Ова значи дека 230.000 приправници во оваа индустрија ќе добиваат 140 евра повеќе месечно, при што ИГ Метал нагласува дека во иднина вработените ќе имаат „повеќе и подобри можности за избори меѓу време и пари“.
Преговорите меѓу синдикатите и работодавачите траеја 18 часа.
Овој договор ќе влијае на околу 3,9 милиони вработени во компании како Mercedes-Benz, BMW, Siemens и Thyssenkrupp.
ИГ Метал првично побара зголемување на платите за 7 отсто во текот на дванаесет месеци, како и поголема флексибилност во однос на работното време. Од друга страна, работодавачите понудија зголемување во две фази од 3,6 отсто во период од 27 месеци.
Стотици илјади работници ширум Германија учествуваа во предупредувачките штрајкови во изминатите неколку недели, пишува Euronews Business.
