Пензиите во Романија ќе се зголемат во просек за 40 отсто во септември 2024 година, рече министерот за труд Бучура Опреску, повикувајќи се на пресметките во новиот предлог-закон.
Првата фаза предвидува индексирање на пет милиони пензии во јануари за 13,8 отсто, според предложениот закон за пензии што Владата ќе го испрати до Собранието до крајот на месецот.
Исплатата на пензиите според новите пресметки ќе започне во септември 2024 година и ќе ја елиминира нееднаквоста, со што се гарантира дека сите граѓани кои работат исто работно место ист број години ќе добијат иста пензија.
Предлог-законот требаше да биде усвоен во првата половина од годинава, но неколку пати беше одложуван. Планираниот датум за стапување во сила се совпаѓа со локалните, парламентарните, претседателските и европските избори.
Владините трошоци за пензиите ќе се зголемат следната година на приближно 146 милијарди леи (31,45 милијарди долари), од 115 милијарди леи оваа година.
Реформата на пензискиот систем е услов за романското „повлекување“ на средствата од фондовите на ЕУ за закрепнување од корона кризата, истакнува Ројтерс, додавајќи дека Букурешт се обврзал да ја елиминира нееднаквоста и да избегне политизација на зголемувањето на пензиите пред изборите.
