Американскиот долар падна на најниско ниво во последните три години, како резултат на повлекувањето на инвеститорите од американските финансиски инструменти и политичките притисоци врз американската централна банка.
Зголемена е нервозата кај трговците, откако американскиот претседател Доналд Трамп вчера повторно остро го нападна претседателот на Федералните резерви, Џером Пауел, нарекувајќи го „господин-премногу-доцна“ и „голем губитник“. Трамп ги засили своите повици за намалување на референтните каматни стапки, што дополнително ја поткопува довербата во стабилноста на американската монетарна политика.
Вчера доларот падна на најниско ниво од март 2022 година, во однос на другите референтни светски валути. Во однос на јапонскиот јен, американската валута достигна најниско ниво во последните седум месеци, нотирајќи стапка од 140 јени за долар, за првпат од септември минатата година.
Во текот на вчерашниот ден, кога европските пазари беа затворени, во тргувањето на Волстрит се забележани нови загуби. Dow Jones Industrial Average падна за дополнителни 2,5%, или за речиси 1.000 поени.
Инвеститорите дополнително се загрижени поради немањето напредок во трговските преговори, откако Трамп на почетокот на месецот најави нови високи царини. Ова создава загрижувачка ситуација во која истовремено паѓаат вредностите на доларот, американските берзански индекси и државните обврзници. Традиционално, во време на криза, доларот и американскиот долг би се сметале за безбедно засолниште за капиталот.
