Општина Штип до денеска наплатила околу 50 отсто од предвидените средства, кои граѓаните ги плаќаат за данок за имот. Драган Каров од Одделението за даноци во Општина Штип вели дека ако се направи споредба со претходната година, до 30 мај 2024 година беа нaплатени 30 отсто од предвидени 54 милиони денари за таа тековна година. Посочува дека годинава подисциплинирани се правните лица, односно од нив се наплатени 50 отсто од предвидените данок на имот, а физичките лица се нешто помалку. Ова ја става Општина Штип на листата подобри општини во државата кога е во прашање наплатата на данок на имот.
-Од побаруваните 60 милиони денари по решенијата од 2025 година до денес се наплатени 31 милион денари, или тоа покажува наплата од околу 50 отсто. Ова покажува дека за разлика од претходните години финансиската дисциплина на граѓаните се зголемува. Ако претходно годината сме ја завршувале со 67 отсто наплата на данок на имот, сега до овој момент имаме 50 отсто наплата, изјави Каров.
Решенијата за наплата на данок на имот се веќе доставени, а крајниот рок за наплата на данокот е до 15 ноември годинава. Каров апелираше граѓаните навремено да ги подмират своите даночни обврски со цел да не се пресметува камата или да се оди кон присилна наплата. Минатата година беа предвидени 54 милиони денари за наплата, а крајниот рок заврши со наплатени 52,5 милиони денари или 97 отсто. Средствата собрани од наплата на данок на имот се инвестираат во капитални проекти во самата општина.
