Google планира да воведе значителни промени во начинот на следење на корисниците на Интернет од февруари следната година, воведувајќи технологија која ќе ги замени сегашните колачиња од трета страна.
Оваа промена воведува „дигитален отпечаток од прст“, метод кој собира информации за уредите и навиките на корисниците на начин што е речиси невозможно да се контролира или запре.
Регулаторите предупредуваат дека технологијата „ја загрозува приватноста на корисниците“ но дека и Google претходно има изјавено дека таквото следење е „погрешно и неприфатливо“.
„Гугл“ објаснува дека одлуката доаѓа како резултат на „напредокот во технологиите за зачувување на приватноста“ (ПЕТ), кои и овозможуваат на компанијата да го олесни рекламирањето додека, како што тврди, ги одржува „очекуваните нивоа на заштита на приватноста на корисниците“, сепак, експертите истакнуваат дека ова е потег што им отежнува на корисниците да разберат како се користат нивните податоци и какви ризици произлегуваат од нив.
За разлика од колачињата, кои може да се блокираат или избришат преку поставките на пребарувачот, „дигиталниот отпечаток“ користи информации како што се IP адресата, поставките на уредот, апликациите што ги користите, па дури и навиките за пребарување за да создаде единствен кориснички профил. Оваа технологија е отпорна на традиционалните методи за контрола на приватноста, што ја прави особено проблематична.
Британскиот комесар за информации, Стивен Алмонд, истакна дека новите правила потенцијално ги прекршуваат принципите на транспарентност и контрола врз приватните податоци. „Отпечатокот на прст се потпира на сигнали кои корисникот не може лесно да ги избрише, дури и кога ги ибрише сите податоци за сајтот. Ова не е транспарентно и им отежнува на корисниците да ја задржат контролата врз нивната приватност“, предупредува Алмонд.
Покрај тоа, Google планира да ја прошири технологијата на уреди како паметни телевизори и конзоли за игри, наведувајќи ги „драматичните промени во начинот на кој луѓето го користат интернетот“. Компанијата тврди дека овој потег ќе и помогне на огласувачите подобро да ја разберат ефикасноста на своите кампањи во фрагментирана средина“ која вклучува повеќе платформи и уреди.
Промените доаѓаат откако Google се соочува со притисок од американското Министерство за правда, кое разгледува можна регулатива, вклучително и потенцијална дезинвестиција на пребарувачот Chrome. Иако Google тврди дека „одговорно ќе ги користи податоците и ќе обезбеди заштита на приватноста“, многу експерти изразуваат сомневање дека новата технологија ќе биде корисна за корисниците.
