Финскиот производител на телекомуникациска опрема Нокиа ќе ја купи американската фирма специјализирана за оптички мрежи Infinera за 2,3 милијарди долари.
„Со оваа аквизиција, Нокиа има намера да го зајакне своето технолошко лидерство во областа на оптиката и да ја зголеми својата изложеност на таканаречените „вебскејл“ клиенти, големи групи специјализирани за дематеријализирано пресметување (cloud), како најбрзорастечки сегмент на пазарот“, посочи компанијата, пренесе Фигаро.
Nokia нуди 6,65 долари по акција на Infinera, што е премија од 28 отсто во однос на цената на затворањето на берзата во четвртокот вечерта.
Трансакцијата се очекува да биде завршена во првата половина на 2025 година.
„Активностите за оптичко вмрежување на двете групи нудат силно стратегиско вклопување, со оглед на високата комплементарност на нивната база на клиенти, географска локација и нивниот технолошки профил“, рече Пека Лундмарк, извршен директор на Нокиа.
Со Infiner, Nokia ја зголемува својата активност во областа на оптичките мрежи за 75 проценти и ја зајакнува својата позиција во САД, каде американската групација генерира 60 проценти од продажбата.
Infinera оствари продажба од 1,6 милијарди долари во 2023 година, додека Nokia во овој сегмент оствари продажба во вредност од 1,9 милијарди евра.
Акциите на Нокиа денеска на Хелсиншката берза поскапеа за 1,31 отсто на 3,55 евра.
