Општина Битола продолжува мака да мачи со отпадните води и канализациската мрежа. При секое поголемо невреме дел од улиците наликуваат на реки, а ваквата состојба ја констатираат и општинските власти. Најголемо количество на годишни врнежи од 863,8 mm имало во 2002 година, додека пак лани врнежите од дожд во Битола достигнаа просек од 741,3 мм. Она што претставува најголем предизвик е што во голем дел канализација е од комбиниран тип – и за атмосферски и за отпадни вод
„Канализационата мрежа се уште не е заокружена, општината Битола се среќава со проблемот со третманот на отпадните води (од станбените населби и индустриските отпадни води). Потребно е доизградба на колекторскиот систем, изградба на колекторски станици, решавање на проблемот со петтиот канал кој е отворен и изградба на пречистителни станици“, се наведува на веб-страницата на Општината.
Во дел од документите и акциските планови на локалните власти, се препорачува подобрување на собирањето, одведувањето и пречистувањето на отпадните води, спречување на поплавување на улиците при поројни дождови и заштита од поплави.
„Фекалната и атмосферската канализација се комбинирани, а испустите на канализацијата се изградени на пониско ниво од реката Драгор, така што во услови на пороен дожд кога нивото на реката расте, отежнато е испуштањето на отпадната вода во реката, така што отпадните води се враќаат назад во канализациониот систем, создавајќи голема содржина на талог и предизвикувајќи излевање на овие води по улиците. Дополнителен проблем претставува тоа што поголемиот дел од канализационата мрежа е од мешовит систем, поради што доаѓа до мешање на атмосферските и фекалните води во цевките“, пишува во Акцискиот план 2024-2030 на Општината.
Во него се додава дека не се чистат редовно и отворените канали околу градот, со кои треба да се прифатат атмосферските води од околните ридови над градот, за да не се оптоварува постојната градска канализација.
„Како резултат на овие технички и организациски проблеми, при секој поголем дожд доаѓа до поплавување на поплавување на улици во Јеенимале, во населба Бадембалари и голем број на улици во населба Баир. КЈП Нискоградба Битола во својот Извештај пишува дека „редовните локални поплавувања после секој поголем дожд се случуваат поради нефункционална, несоодветна или дотраена канализациона мрежа. Атмосферските шахти и сливници се сервисираат во зависност од обемот на работата“, се додава во Акцискиот еколошки план.
Еден од начините за надминување на состојбата е и изградбата на колекторски систем, рехабилитација на канализационата мрежа и изградба на Пречистителната станица за отпадни води во Битола. Со поширокиот проект за систем за управување со отпадните води во Битола кои целосно се испуштаат во реката Драгор, предвидена е изградба на канализациска мрежа во Горно Оризари, реконструкција на дел од канализационата мрежа во градот Битола од улицата Солунска до Широк сокак, потоа изградба на главни колектори од Битола до главниот прифатен колектор, изградба на пумпна станица и притисочни цевководи за село Кравари, продолжување на канализационата мрежа до Долно Оризари и изградба на пумпна станица со притисочен колектор до Пречистителната станица за отпадни води. Засега овој план е се уште на хартија. Јавната набавка за изградба на канализацијата е одамна завршена, но се уште не е потпишан договорот со фирмата изведувач. Посоти и ризик да се загубат средствата наменети за канализацијата, зашто станува збор за пари од европските фондови кои се предвидени за трошење до крајот на оваа година. Проектот стагнира иако може да биде решение на честите предизвици за битолчани, при секој поголем дожд.
Нови дождови пред старите проблеми со канализацијата во Битола
