Со оглед на структурните проблеми со кои се соочува економијата, малку е веројатен пресврт во германската индустрија.
Се чини дека е време Германците да почнат да се помируваат со падот на нивната некогаш голема економија.
Германците во моментов се соочуваат со четворицата коњаници на економската апокалипса во форма на егзодус на големата индустрија, брзо влошена демографска слика, пропадната инфраструктура и недостаток на иновации, пишува Politico.
Во последниве години, Германците беа преокупирани со миграцијата и конфликтот во Украина, за кое време нивната економија тивко пропаѓаше, се додава во овој весник. Економските слабости ги поттикнуваат стравувањата дека земјата ќе се соочи со политички екстремизам.
Економските проблеми сега се во преден план. Ова е лоша вест за канцеларот Олаф Шолц и неговата „семафорска коалиција“. Дури и пред неодамнешните економски проблеми, Шолц се соочи со најниска доверба од кој било германски лидер. Најниското ниво на доверба за време на шеснаесетгодишното владеење на Ангела Меркел беше 40 отсто, додека Герхард Шредер го достигна дното со 24 отсто.
Шолц најверојатно ќе претрпи уште едно понижување оваа недела: победата на десницата на регионалните избори во Германија, во неговата родна покраина Бранденбург. Социјалдемократската партија (СПД) на Шолц владее со Бранденбург од обединувањето на Германија.
Сепак, анкетите покажуваат дека десничарската партија Алтернатива за Германија (АфД) сега води, а прашање е дали нејзината ослабена коалиција воопшто ќе издржи до следните сојузни избори.
Германската економија е во криза
Пред 15 години, Германија изгледаше како да ја пронајде магичната формула за просперитет. Со индустриска база заснована на технологии од 19 век, на Германија и е се потешко да остане конкурентна. Компанијата „Тесла“ сега вреди четири пати повеќе од германската автомобилска индустрија, а тука е и се помоќната Кина.
Се чини дека Германија сега се соочува само со лоши вести: американскиот гигант за производство на чипови „Интел“ објави дека ја замрзнува планираната инвестиција вредна 30 милијарди евра. Инвестицијата, која требаше да донесе 3.000 работни места, ќе беше најголемата инвестиција на странска компанија во германската историја.
Ова дојде по веста дека Фолксваген размислува да затвори фабрики во Германија за прв пат во својата 87-годишна историја. Ова ја потресе Германија и ја натера да се соочи со фактот дека е во продолжена стагнација, која започна во 2020 година.
Економската перспектива на Германија може само да стане помрачна. Како што неодамна објави економскиот институт Ifo: „Германската економија е во криза“. Покрај брзото стареење на општеството и ниската продуктивност, земјата е сериозно погодена и од падот на домашната потрошувачка.
Германската индустрија е погодена од конфликтот во Украина, што ја спречи да дојде до евтин руски гас. Во Дуизбург, компанијата „Тисен Круп“, поранешен шампион во производството на челик, се бори некако да опстане и покрај ветените субвенции од германската влада од околу две милијарди евра.
Целта на владата е Дуизбург да го претвори во центар за „зелен челик“, заменувајќи ги постојните печки на јаглен. Германската челична индустрија вработува околу 80.000 работници, но повеќето производители го намалија производството поради презаситеноста, предизвикана од слабоста на германската автомобилска индустрија, наведува „Политико“.
Пред неколку месеци се чинеше дека работите тешко можат да станат полоши за СПД. На европските избори во јуни, партијата ги доживеа најлошите изборни резултати во повеќе од еден век. На покраинските избори во источна Германија, коалициските партии предводени од СПД претрпеа тежок пораз.
Лидерот на Христијанско-демократската коалиција Фридрих Мерц неодамна изјави: „Сакаме и мора да останеме индустриска земја“.
Но, со оглед на структурните проблеми со кои се соочува германската економија, малку е веројатен пресврт во германската индустрија. Се чини дека е време Германците да почнат да се помируваат со падот на нивната некогаш голема економија, заклучува Политико.
