Еден од најзначајните автомобили во историјата на BMW Motorsport е официјално ставен на продажба. Станува збор за првиот развоен примерок на BMW 3.0 CSL, тркачката верзија на прекрасниот модел E9, кој се појави во 1973 година – само една година по формирањето на BMW Motorsport GmbH. Шасијата позната како E9/R1 претставува првото целосно завршено возило во проектот и токму таа експонатна единица денес повторно е понудена на пазарот.
Автомобилот го продава британската компанија Dylan Miles Ltd, а се појави на платформата Classic Driver без јавно објавена цена. Развојниот примерок е произведен на преминот меѓу крајот на 1972 и почетокот на 1973 година, со цел да служи како тестно и инженерско возило за фабричкиот тркачки тим. Во тие строги зимски месеци зад воланот се менувале легендарните возачи Ханс Штук и Харалд Менцел.
Токму од овој прототип потекнува култниот аеродинамичен пакет познат како „Batmobile“. Првите тркачи верзии на 3.0 CSL настапувале без агресивниот body-kit поради строгите правила на FIA за хомологација. Откако BMW Motorsport го добил официјалното одобрение, инженерите експресно го надградиле автомобилот во спецификацијата што подоцна ќе стане легенда во светот на туринг-трките.
Примерокот E9/R1 низ годините менувал сопственици меѓу различни тимови, сè до неговото повлекување од натпреварувања. Потоа преминал во приватни колекции, а по темелна реставрација бил вратен во оригиналната пред-Batmobile форма. Моделот повторно се појави пред јавноста на Goodwood Festival of Speed 2021, а неодамна привлече големо внимание и на престижниот Salon Privé Concours d’Elegance во Бленхајм Палас, овојпат во целосна Batmobile конфигурација.
Значењето на 3.0 CSL за М-одделот е невозможно да се прецени. Токму овој модел ја постави основата за идентитетот на „најмоќното слово на светот“. Во чест на 50-годишнината во 2022 година, BMW го оживеа духот на CSL со ексклузивната серија од 50 примероци на современиот 3.0 CSL, базиран на M4 и опремен со најмоќниот реден шестцилиндарски мотор некогаш поставен во сериски BMW.
Со оглед на историското значење, автентичната документација и фактот дека станува збор за првиот завршен CSL воопшто, експертите очекуваат дека шасијата E9/R1 може да достигне цена повисока од било кој модерен BMW колекционерски модел.
Овој автомобил не е само тркачка легенда – тој е темелот врз кој BMW Motorsport ја изгради својата глобална репутација.
