Добитникот на „Златната топка“ Родриго Ернандез иако лежи на пари, познат е по неговата скромност, за која толку многу се зборуваше.
Приказната за одличниот шпански играч за врска е позната од поодамна. Тој е најскромниот играч на денешницата, кој не го интересираат социјалните мрежи, ниту пак сака да троши пари на луксузни предмети, иако според договорот со Манчестер Сити може да си дозволи многу повеќе од останатите фудбалери.
Родри нема профили на социјалните мрежи, дење и ноќе е посветен на хуманитарната работа, а со години живеел во студентски дом иако тогаш заработувал милиони. Долго време возел половна Опел Корса, тогаш вредна само неколку илјади евра, додека неговите ривали на теренот се расфрлаат и купуваат суперавтомобили.
Додека траеше пандемијата на коронавирус, неговиот фокус беше исклучиво на развојот на фудбалската кариера, но и на образованието, па се посвети на дипломирањето на Факултетот за бизнис администрација и менаџмент.
Во моменти кога според неговиот договор заработувал 120.000 фунти неделно, Родри сè уште живеел во студентска соба. Во исто време, тој беше фокусиран на образованието и не сакаше да купи стан или куќа.
„Луѓето беа шокирани кога го видоа Родри, кој играше во шпанската Ла Лига, но сепак живееше во универзитетска резиденција. Тој секогаш беше сосема „нормален“. Тој го делеше просторот и времето со сите и сакаше да поминува време со своите пријатели, иако беше фудбалска ѕвезда“, изјави неговиот пријател Валентин Хенарехо за Marca пред неколку години.
Најдобриот играч на светот е голем хуманитарец, па од почетокот на кариерата до денес четвртина од неделните примања издвојува за хуманитарни цели.
Шпанскиот репрезентативец е против тетоважи и нема никаква на телото, ниту пак сака социјални мрежи во каква било форма. Неговиот пристап како играч и човек е сосема едноставен, но исклучително му „прилега“ и носи резултати на теренот.
Исто така, девојката на Родриго, Лаура Иглесијас е со него од раните фудбалски денови и го придружуваше на тешкото патување до титулата најдобар фудбалер на светот. Таа е студент по медицина, а Родри претходно откри дека неговите прослави на голови и биле посветени на неа.
Иако многумина не се согласуваат дека заслужено ја доби Златната топка, никој не може да му ја одземе. Едноставно, тој ги искористи своите предности во однос на другите и го доби најголемото признание во светот на фудбалот.
