Плата од над седум илјади евра месечно, наспроти примања кои вредат само неколку десетици долари, тоа е сликата на просечните примања во светот за 2025 година, според податоците кои денес ги објави Numbeo. Очекувано, на самиот врв на листата по висина на месечни примања е Швајцарија, каде просечната нето плата е 7.369 долари месечно, што ја прави светски лидер по личен доход. Следен е Луксембург со 6.379 долари, додека третото место им припаѓа на Исланд со 4.381 долар.
На дното на листата, пак, се наоѓаат две држави каде платите се во двоцифрени бројки, поточно под 100 долари – тоа се Куба, која е убедливо последна на листата на која се 126 земји, со просечна плата од само 35,35 долари и Сирија, на претпоследното место со 45,85 долари месечна плата. Македонија на оваа листа се наоѓа некаде на златна средина, поточно на 66-то место, со просечна плата од 716,47 долари.
Numbeo е најголемата светска база на податоци од корисници за градови и земји ширум светот. Numbeo објавува тековни информации за условите за живот во светот, вклучувајќи ги трошоците за живот, индикаторите за домување, здравствената заштита, сообраќајот, криминалот и загадувањето.
Просечната месечна нето плата по земја се однесува на просечната сума на пари што вработен ја добива откако ќе се одземат даноците и другите одбитоци од неговата бруто плата, во одредена земја. Просечната месечна нето плата е под влијание на различни фактори како што се економскиот раст, даноците, трошоците за живот и владините политики. Тоа е важна метрика што се користи за проценка на животниот стандард во одредена земја и може значително да варира во различни региони и земји.
На листата на Намбео за 2025, во првите 10 држави во светот со највисоки просечни месечни плати, освен Швајцарија, Луксембург и Исланд, се најдоа уште и Соединетите Американски држави (со пад од едно место во однос на 2024 и со просечна плата од 4.336 долари) , Данска (3.984 долари), Сингапур (3.911 долари), Холандија (3.777), Катар (3.715), Хонг Конг (3.653) и Норвешка (3.571 долар).
На истата листа, од поранешните југословенски републики, Словенија се најде на високото 37-то место според висина на просечната плата – со 1.667 долари месечно, а потоа следи Хрватска, на 42-то место, со 1.529 долари.
Од останатите држави на Балканот, барем оние кои не се членки на Европската Унија, на листата повисоко од Македонија котираат Црна Гора (на 53-то место), со просечна плата од 952 долара, Србија (на 57-мо место) со 884 долари, како и Босна и Херцеговина со 763 долари (65.место). Албанија и Косово имаат помали просечни плати, според листата на Намбео, нашиот западен сосед е на 68. место со примања од 709 долари, додека Косово се најде на 80-то со просечна плата од 584 долари.
