Повеќе од 50 земји, меѓу кои и Македонија, стапија во контакт со Белата куќа за да започнат разговори поврзани со трговијата, изјави денеска главниот економски советник на американскиот претседател Доналд Трамп, откако големите нови царини предизвикаа глобални превирања.
Во интервју за вестите на Еј-Би-Си, директорот на Националниот економски совет на САД, Кевин Хасет, негираше дека царините се дел од стратегијата на Трамп чија цел е колапс на финансиските пазари, сѐ со цел да се изврши притисок врз американската централна банка да ги намали каматните стапки.
Хесет рече дека нема да има политички притисок врз централната банка. Во објавата на Truth Social во петокот, претседателот Трамп сподели видео во кое сугерира дека новите давачки се насочени кон намерно уривање на берзата во обид да ги принудат банките да ги намалат каматните стапки.
Во одвоено интервју за вестите на Ен-Би-Си, американскиот министер за финансии, Скот Бесент, го намали значењето на падот на берзата, нагласувајќи дека „нема причина“ да се предвиди рецесија врз основа на воведените царини.
Одлуката на претседателот Трамп ги потресе економиите ширум светот, откако во средата објави низа нови давачки за американскиот увоз, што ја поттикна Кина да возврати и да ги поттикне стравувањата од рецесија и глобална трговска војна.
Пазарите погодени од царините се соочуваат со уште една недела на потенцијална тарифна турбуленција, најтешка по мачната недела за американските акционери од почетокот на КОВИД 19 кризата.
Хесет изјави дека царините на Трамп досега поттикнале повеќе од 50 земји да контактираат со Белата куќа за да започнат разговори.
За разлика од другите економисти, Хесет не очекува преголем удар за потрошувачите бидејќи верува дека извозниците ќе ги намалат цените за да ги приспособат производите наменети за американскиот пазар.
Бесент пак изјави дека не предвидува рецесија поради царините и наведе дека зголемувањето на работните места во САД ќе биде поголемо од очекувањата.
