Минималната плата во Турција следната година ќе биде повисока за 30 отсто.
Турскиот претседател Реџеп Таип Ердоган соопшти дека минималната месечна нето плата во Турција ќе изнесува 22.104 турски лири (околу 606 евра), што е зголемување за 30 отсто во однос на годинава.
Економистите очекуваат зголемувањето на минималната плата, што се однесува на околу 9 милиони работници и се смета за репер за зголемување на платите во приватниот сектор, да ја зголеми инфлацијата во наредните месеци, објави Ројтерс.
Според пресметките на агенцијата врз основа на студиите на турската централна банка, зголемувањето на платите од 25 отсто ќе ја зголеми годишната инфлација меѓу 1,5 и 5,0 процентни поени.
Турската инфлација падна на 47,09 отсто во ноември од годишниот максимум од 75 отсто во мај, најмногу поради строгата монетарна и фискална политика.
