Италијанската премиерка Џорџија Мелони повика во петокот на климатскиот состанок COP28 во Дубаи дека здравата храна не треба да се резервира само за богатите, а синтетичката храна и онаа произведената во лабораторија да биде за сиромашните.
На првиот ден од климатскиот состанок на кој присуствуваа политичките лидери, Мелони предупреди на „свет во кој богатите јадат природна, а сиромашните синтетичка храна со непредвидливо влијание врз здравјето“, пренесува италијанската агенција АНСА.
„Тоа не е светот што сакам да го видам“, продолжи таа, повикувајќи на здрава храна „за сите“.
Во своето обраќање, кралот Абдула од Јордан повика дека климатските промени не треба да се дискутираат „изолирано од хуманитарните трагедии што се случуваат околу нас“.
„Додека се обидуваме да го надоместиме изгубеното време и напредок, не смееме да ги заборавиме најранливите. Заедниците погодени од конфликти, бегалците и земјите во развој не смеат да бидат оставени сами во борбата против глобалниот проблем.
Ниту, пак, можеме да стоиме настрана додека масовното уништување и немилосрдната војна во Газа се закануваат на се повеќе луѓе и го спречуваат напредокот кон подобра глобална иднина“, рече Абдула. Претставниците на Иран ја напуштија конференцијата поради присуството на делегати од Израел, објави Франс прес.
Бразилскиот претседател Луис Инасио Лула да Силва исто така предупреди дека денес „ниту една земја не може сама да ги реши своите проблеми“.
„Ние сме должни да дејствуваме заедно надвор од нашите граници. Бразил е подготвен да води како модел“, рече лидерот на земјата задолжена за управување со прашумите на Амазон, „белите дробови на светот“.
„Светот веќе е убеден во потенцијалот на обновливите извори на енергија. Сега е време да започнеме дискусија за бавноста со која ја декарбонизираме планетата и како да се движиме кон економија која ќе биде помалку зависна од фосилни горива“, рече Лула на состанокот во Емиратите, земја која планира да се прошири производството на нафта, пренесува Ројтерс.
Индискиот премиер Нарендра Моди, претставник на најнаселената земја во светот, предупреди дека „нема многу време да се поправат грешките од минатиот век“.
„Во текот на минатиот век, мал дел од човештвото неселективно ја експлоатираше природата. Но, целото човештво ја плаќа цената за тоа, особено жителите на Глобалниот југ“, рече Индиецот.
Земјите во развој негодуваат за западните земји, кои поради претходниот индустриски развој заснован на „повалкани“ извори на енергија, се кумулативно најмногу одговорни за светските емисии низ историјата, па сега ги повикуваат сите земји да се откажат од фосилните горива.
Моди, исто така, објави дека Индија сака да биде домаќин на COP во 2028 година. Следната година средбата треба да се одржи во Источна Европа ротирачки, но точната локација се уште не е позната.
